Rreth nesh

Qendra për Nisma Ligjore Qytetare (QNL) është një organizatë shqiptare jofitimprurëse, me seli në Tiranë, e themeluar në nëntor të vitit 1997. Që prej vitit 2001, QNL-ja ka edhe një degë në qytetin e Shkodrës.

QNL-ja ofron shërbime ligjore dhe psikosociale për gratë që kanë përjetuar dhunë dhe për gratë në nevojë. Të gjitha shërbimet ofrohen falas.

Vizioni ynë

“Ligjshmëria është instrument për zhvillimin e grave.”

Misioni ynë

Mbështetja, ndihma dhe edukimi ligjor i njerëzve, me përparësi gratë dhe vajzat, për të rritur aksesin e tyre në institucionet publike dhe, veçanërisht, në sistemin e drejtësisë, përmes:

Ofrimit falas të shërbimeve ligjore dhe psikosociale për viktimat e dhunës në familje dhe të formave të tjera të dhunës, si dhe për personat në nevojë.
Edukimit ligjor për njohjen dhe ushtrimin e të drejtave dhe lirive të njeriut, të parashikuara nga Kushtetuta, aktet ndërkombëtare dhe ligjet.
Advokimit dhe lobimit për demokratizimin dhe rritjen e efektivitetit të sistemit të drejtësisë, përmes studimit, monitorimit dhe përhapjes së përvojave e praktikave më të mira.
Ndërmarrjes dhe mbështetjes së nismave për përmirësimin e legjislacionit dhe lobimit për projektligje e politika shtetërore në mbrojtje të të drejtave të njeriut, me fokus barazinë gjinore, dhunën në familje, korrupsionin dhe trafikimin e qenieve njerëzore, në përputhje me standardet më të përparuara ndërkombëtare dhe të Bashkimit Evropian.

Struktura e QNL-së

Bordi drejtues
Drejtori ekzekutiv
Sektori për përmirësimin e legjislacionit dhe funksionimin e duhur të organeve të drejtësisë
Sektori i shërbimeve ligjore
Sektori psikosocial
Sektori i hartimit dhe menaxhimit të projekteve
Sektori i ndihmës juridike për organizatat jofitimprurëse (funksionoi përkohësisht gjatë viteve 2001–2003).

Fushat e ekspertizës

Drejtësia civile dhe penale.
Barazia gjinore si element i shtetit të së drejtës.
Parandalimi dhe lufta kundër dhunës në familje.
Këshillimi psikosocial individual, në grup dhe në familje.
Studimi dhe monitorimi i legjislacionit dhe politikave për mundësi të barabarta.
Edukimi ligjor dhe trajnimi i publikut për të kuptuar dhe zbatuar legjislacionin.